Paragliding viral Video गोव्याच्या समुद्रकिनाऱ्यावर पॅराग्लायडिंगचा थरार अनुभवण्यासाठी गेलेल्या एका महिलेसोबत धक्कादायक प्रकार घडल्याचा व्हिडिओ सध्या सोशल मीडियावर मोठ्या प्रमाणात व्हायरल होत आहे. साहसी खेळाचा आनंद घेत असताना काही क्षणांतच परिस्थिती इतकी गंभीर झाली की, महिलेला स्वतःचा जीव वाचवण्यासाठी संघर्ष करावा लागला. हा संपूर्ण प्रकार कॅमेऱ्यात कैद झाला असून तो पाहून अनेकांच्या अंगावर काटा आला आहे.
आजकाल साहसी खेळांची क्रेझ मोठ्या प्रमाणात वाढताना दिसते. वेगळा अनुभव घेण्यासाठी लोक पॅराग्लायडिंग, बंजी जंपिंग, स्कुबा डायव्हिंग यांसारखे खेळ आवर्जून करतात. मात्र, अशा खेळांमध्ये सुरक्षा अत्यंत महत्त्वाची असते. गोव्यात घडलेल्या या घटनेने पुन्हा एकदा सुरक्षेच्या नियमांवर प्रश्नचिन्ह निर्माण केले आहे.
व्हायरल होत असलेल्या व्हिडिओमध्ये महिला समुद्राच्या मधोमध बोटीला जोडलेल्या दोरीच्या सहाय्याने पॅराग्लायडिंग करताना दिसते. सुरुवातीला सर्व काही सुरळीत सुरू असते. मात्र काही वेळातच अचानक परिस्थिती बदलते आणि ती हवेत स्थिर राहण्याऐवजी समुद्राच्या दिशेने खाली येऊ लागते. याचदरम्यान पॅराग्लायडिंगची दोरी तिच्या गळ्याजवळ अडकते. हा प्रकार लक्षात येताच महिला घाबरून जाते आणि स्वतःला सावरण्याचा प्रयत्न करू लागते. तिची धडपड पाहून हा प्रसंग किती भयावह होता याची कल्पना येते.
सुदैवाने या घटनेत महिलेला कोणतीही गंभीर दुखापत झाली नाही आणि तिची सुरक्षित सुटका करण्यात आली. मात्र, हा अनुभव तिच्यासाठी आयुष्यभर लक्षात राहणारा ठरला. संबंधित महिलेनं हा व्हिडिओ तिच्या इंस्टाग्राम अकाउंटवर शेअर करत आपला अनुभव सांगितला आहे. थराराचा आनंद घेण्यासाठी केलेल्या या साहसाने काही क्षणांत भीतीचं रूप घेतलं, असं तिनं म्हटलं आहे.
तिनं आपल्या पोस्टमध्ये सांगितलं की, समुद्राच्या मध्यभागी असताना दोरी गळ्याभोवती अडकल्याने काही क्षण ती पूर्णपणे घाबरली होती. त्या क्षणी काय होईल याचा अंदाजच येत नव्हता. स्वतःची सुटका झाल्याबद्दल तिनं नशीबवान असल्याचं म्हटलं. तसेच कोणताही साहसी किंवा जलक्रीडा प्रकार करण्यापूर्वी सुरक्षेची पूर्ण खात्री करून घ्यावी, असा सल्लाही तिनं दिला.
हा व्हिडिओ सोशल मीडियावर वेगाने पसरत असून अनेक नेटकऱ्यांनी साहसी खेळांमध्ये निष्काळजीपणा टाळण्याची गरज व्यक्त केली आहे. काहींनी आयोजकांनी अधिक काटेकोर सुरक्षा व्यवस्था ठेवावी अशी मागणी केली, तर अनेकांनी “थरार महत्त्वाचा असला तरी जीव सर्वांत महत्त्वाचा” अशा प्रतिक्रिया दिल्या आहेत.
